صرح السيد وزير التعليم فى الصحف والقنوات المختلفة وملأ الدنيا
ضجيجاً بأن المدارس جاهزة لمواجهة مرض إنفلوانزا الخنازير عند
بداية العام الدراسى والمقرر له أن يبدأ بعد غد السبت الموافق
2009/10/3 وعُقد إجتماع لمجلس الوزراء ومن بعده
إجتماع لمجلس المحافظين الذى كان من أهم قرارته أنه
لا تأجيل لموعد بدأ الدراسة وأن كل محافظ له كل
الصلاحيات فى محافظته على حسب ظروف كل
محافظة .
ولكن !!
هل إستعدت كل محافظات مصر فعلياً لإستقبال العام الدراسى ؟
أم أنها مجرد تصريحات إعلامية فقط
وبما أنى ولى أمر فقد تعايشت على الوضع فى طبيعته
فقد ذهبت اليوم إلى مدرسة أولادى لكى أستفسرعن مواعيد
العمل بالمدرسة هل هى فترتين ؟ أم فترة واحدة ؟ أم ثلاثة أيام ؟
وثلاثة أيام ؟ وكانت المفاجأه لى بأن مدير المدرسة لا يعرف
ماهو نظام العمل بالمدرسة ولم تستلم المدرسة أى من المطهرات
أو الكمامات لمواجهة المرض ، وبينما أنا جالس مع السيد مدير
المدرسة فإذا بثلاثة فاكسات يصلون المدرسة وعندما قرأنا
الثلاثة فاكسات فوجدناهم متضاربة المحتوى
الفاكس الأول :- يحدد بأن نظام الدراسة بالمدرسة فترتين
أما الثانى :- فحدد نظام الدراسة بالمدرسة ثلاثة أيام وثلاثة
أما الثالث:- فحدد نظام الدراسة بالمدرسة فترة واحدة على
ألا يزيد الفصل عن أربعين طالباً والباقى يتجهون إلى مدرسة
أخرى تبعد عن منازلنا بحوالى خمسة كيلو مترات يتخللهم
محطة قطار وطريق مصر إسكندرية الزراعى ناهيك عن
السيارات على جميع الأشكال.
فبالله عليكم كيف يذهب طفل فى المرحلة الإبتدائية إلى مدرسة
تبعد عن مسكنه خمسة كيلو مترات ذهاباً ومثلهم فى العودة سيراً
على الأقدام ؟ لعدم وجود وسيلة مواصلات لأن المدرسة الأخرى
فى نفس المدينة مع الوضع فى الإعتبار الأخطار سالفة الذكر .
وأخيراً كيف أطمئن وأرسل أولادى إلى المدرسة ؟
.jpg)
27 التعليقات:
ولا الوزير نفسه لو سألته عارف حاجه
ولا وزير الصحه عارف
ولا اللى اكبر منهم عارف اى حاجه
والموضوع بيتساب على حسب ظروفه
يعنى شغل كدة وشوف الامور هتمشى ازاى
والناس من نفسها هترتب ايه وعلى أساسها اتصرف وقرر
يعنى كل الكور مرميه فى ملعب الناس واى تصرف يبقى مفيش مسؤل مباشر عنه يسائل او يحاسب لأنه فعلا مفيش أى حد أصدر أمر مباشر بأى شئ ولا رتب أى حاجه يتحمل مسؤليتها
أولادك بقى
لهم رب أسمه الكريم
بطلوا اشاعات بقي
بقي الوزير مش عارف حاجة
دي الحكومة كلها مش عارفة حاجة
وبعدين مين اللي قال إن مصر لم تستعد للإنفلونزا
استعدت بالأكفان والمقابر الجماعية
لا حول ولا قوة إلا بالله
صلي علي النبي
السلام عليكم ورحمة الله وبركاته
صديقى العزيز
حضرة المنوفى التمام
تحياتى
وايه بس اللى تعبك وخلاك تروح المدرسه
كان كفاية انك تسألنى وانا كنت هجاوبك واقولك كمان على حكاية المدرسه البعيده عن بيتكم
تصدق يامؤمن انا فى الحكاية دى اعرف اكتر من وزير التعليم
لانى مدرس وعايش فى قلبها
شوفت نظام السنه اللى فاتت هو هو نظام السنه دى
مافيش اى تغيير غير بس انهم كل شويه يقولولك تفتيش علشان الانفلونزا وشوية هجص وكلام فاضى ومحدش هينفذ اى حاجه
وبعدين ايه كمامات ومطهرات
بجد هزعل منك ياعمرو
عيب لما انت تقولى على حكومتنا انها هتسلم المدارس الحاجات دى
مش احنا
هفوتهالك المرة دى
بس لو عملت كده تانى وظنيت الظن الوحش ده فى الحكومه هزعل منك
ســــــــــــلام
من الاخر ما حدش عارف حاجه
المهم الوزير يطلع فى التلفزيون ويتكلم ويقول تصريحات
أخر حاجه ممكن يفكروا فيها هى الاولاد ومصلحتهم وصحتهم
زهقنا واللهى
تحياتى
يارب ارفع عنا البلاء
واحفظ بلادنا آمنة مطمئنة
.................................
السلام عليكم ورحمه الله وبركاته
كل يوم يظهر قرارات وكل يوم كلام شكل
وكل يوم اخبار عن انفلونزا الخنزير وكل يوم حكاوى جديده الواحد مبقاش عارف اى حاجه فى اى حاجه الواحد مبقاش عارف هما بيلهو الناس بالاخبار دى ليه ليه هما مابيتصرفوش على طول ولا هو لازم الشعب هو اللى يتحرك
وقال بيقولو الطلبه هتروح المعاهد والجمعات والمدارس وكل حاجه كويسه
وقال الطالبه الاطفال هيدوهم كمامه ومنديل يمسحو الدسك اللى هيعدو عليه ان مش عارفه ايه المشكله لو نظافه كويسه مكنش حصل الوباء ده ولا كان جر حاجه للناس اللى ماتت دى كله دلوقتى اى حد يجيلو اى سخنيه يقول خلاص هموت عملو للشعب رعب ربنا ياستر يارب
تحياتى
أظن أنه طالما أخذنا بوسائل الوقاية المتاحة لنا
وأخذنا بالأسباب
فلنمارس حياتنا طبيعية
وقال تعالى "والله خير حافظاً وهو أرحم الراحمين"
أسأل الله أن يرفع عنا البلاء
الواضح كالاتي
1- تحبط بين الجميع لابعاد المسئوليه
2- من باب اللهم قد بلغت
3-شغل الراي العام بشئ بهدف تمرير امور اخري سوف تتضح فيما بعد
4-عدم وجود خطة عمل محدده
في السعودية تسير الحياة بدون بلبله لوجود اجراءات و جهود حكوميه لاحتواء الازمه و لم نجد ان كل من هب و دب يقوم بالتحدث و الافتاء فيما لا يعرف فلو مت الازمه فقد نصحت و اذا كانت الطامة الكبري فقد حذرت
و اضم صوتي لصفاء
تحياتي
السلام عليكم
والله الوحده مننا كل يوم بتسمع كلام وقررات ومحدش عارف مين الصح ومين النا يرفع عنا البلاء ويعفو عنا
متشكره قووى لحضرتك على مثل هذا الموضوع
ربنا يبارك فيك
مودتى
انوسه
rbna yostr 3la wladna w3la eldonya wl ayam el gaya allahom arf3 mktak wghadabk 3na
السلام عليكم ورحمة الله وبركاته
أعانكم الله وحفظ أبنائكم الأعزاء فالله خير حافظا وهو أرحم الراحمين .
والله انت تخلى العصفورة و اخوها فى البيت
احسن
مفيش حد هيخاف عليهم اكثر منك
ولا ده همو حاجه ولا ده هيخاف على حاجه
عيالهم فى مدارس و جامعات اجنبيه
هيدوش دماغه ليه بقى بالشعب القحطانى ولا بأمورهم
يلا ربنا يحاسب كل ولى أمر و اهمل فى مسؤليته فى حق هذا الشعب الكادح
بص بقى انت عامل ايه
أتمنى من الله ان تكون فى افضل حال
معلش لنا نقصر فى حقك كثير لكنك تعلم ما بى من امور
السلام عليكم
ازى حضرتك يارب تكون بخير
بص اعمل نفسك مصدقه الوزير الكبارة
ده
ربنا يحفظك وذريتك ويحفظنا جميعا يارب
تقبل تحياتى
قل لن يصيبنا الا ما كتبه الله لنا
قل لن يصيبنا الا ما كتبه الله لنا
اللؤلؤه السلام عليكم الرقيه والدعاء سيحفظوا الاولاد باءذن الله والماء وعسل النحل بنية الشفاء فيه الخير وهو سنه عن الحبيب المصطفى صلى الله عليه وسلم يارب يحفظ الاولاد من كل سوء توكل على الله والله خير حافظا وهو ارحم الراحمين وكل عام وحضرتك بألف خير
أخي العزيز اللؤلؤة
وعليكم السلام ورحمة الله وبركاتة وأنت بكل خير ويسعدني الأتصال بك إن شاء الله في كل خميس بعد المغرب وربنا ينور بصيرة الجميع ويدركوا خداع الأجانب قبل ضياع الأمل مع خالص تحياتي والسلام ولا سلام مع قتلة الأنبياء والأطفال بني إسرائيل .
مش عارفة أقول لحضرتك إيه ،الحقيقة الوضع كله مش مريح
بجد ربنا يستر و يحفظنا من شر هذا الوباء
السلام عليكم ورحمة الله وبركاتة ,,
اخبارك اية أ/ لؤلؤة المحترم
ربنا يكرمك يارب والمسلمين .. ومش هنقول غير الستر من عندك يارب ... لان فعلا التصريحات متضاربة مش فى مصر بس وكمان فى الدول العربية ... وان شاء الله خير ... بس نتوكل على الله ونعمل كل الاحتياطيات الازمة والباقى على ربنا .. وقل لن يصيبنا الا ماكتب الله لنا .
وغالباً الوباء المزعوم كدبة جديدة عشان يستنزفوا اموال الشعب ويصرفوا الادوية والامصال بتاعة برة
اصلا الوقت ده طبيعي ان كل الناس فيه بتاخد برد عشان تغيير الجو واللي مناعتهم ضعيفة لا تتحمل نزلات البرد زي الاجانب هما بس اللي يخصهم الخطر لكن المصريين اصلا اخدين على نزلات البرد المستمرة
في اطباء كتيير قالوا ان الموضوع مش بالخطورة دي
بكرة يكتشفوا انها افتكاسة من واحد ظريف عشان يبيع الديتول اللي عنده
أخي وصديقي اللؤلؤة
بارك الله لي فيك وبارك الله لك في أهلك وجميع من تحب مع خالص تحياتي والسلام ولا سلام مع قتلة الأنبياء والأطفال بني إسرائيل .
مع الاسف تضارب فى القرارات وتخبط فى التخطيط
والضحية الابناء واولياء الامور
وربنا المستعان
تحياتى
يارب احفظ اهل مصر وجميع الامه
الاسلاميه ...
عن كل بلاء ..
حفظكم الله ورعاكم ..
جنات
أبى الغالى
السلام عليكم
سترنا الله بستره الجميل
وعافانا الله من هذا
المرض الوبائى القاتل
خالص تقديرى
ربنا يستر علينا
السلام عليكم ورحمه الله وبركاته
انا أوؤيد كلام حضرتك وكل الى بيتقال وبيتشاف ده علشان يتصور ويتزاع فى النشره فقط لا غير
انا اسكن فى محافظه اخرى غير محافظات القاهره الكبرى وأبى يعمل فى مجال التعليم ولا توجد اى استعدادات للوضع الحالى لايوجد كمامات توزع كما يقال ولاتوجد منظفات ولا مطهرات تطهر بها الفصول كما رأيت فى احدى الصحف القوميه حتى قد يكون الحمامات غير أهله للاستخدام الادمى
كلنا عارفين ان كل لن يصيبنا الا ماكتبه الله لنا وكلنا لينا رب اسمه الكريم
بس برضوا اعقلها وتوكل وناخد بالاسباب
مش عارفه لازم الحكومه تحس ان فيه شعب وراها مراقب تصرفاتها وغلطاتها علشان يقومها يعنى اى حد يشوف حاجه غلط يتكللللللللم ويقول ده غلط واعملوا هنا وصلحوا هنا
مش هانموت يعنى لو اتكلمنا
تحياتى لك
الثلاث فاكسات مثال لما نعيشه الأن .. تخبط في تخبط
تحياتي
إرسال تعليق